خمس خطوات لإتقان أي نص متحرر للصف الأول والثاني الثانوي
السلام عليكم حبايبنا الغاليين طلاب الصف
الأول والثاني الثانوي، معاكم أخوكم أحمد ناجي معلم لغة عربية، وصاحب قناة دروس
عربية على اليوتيوب، وبنحاول كدا إننا ندرس اللغة العربية ونظهرها على أنها سهلة
وبسيطة، ومفيهاش أي تعقيد: قال يعني احنا اللي هنجيب الديب من ديلو
نهايتو، النهارده إن شاء الله هنعرفك إزاي تبقلظ
أي قطعة نصوص متحررة تقابلك، ودا من خلال 5 خطوات مهمين جدا، لو نفذتهم مش هيبقى
عندك أي مشكلة مع النصوص المتحررة في الثانوية الحزن اللي انت فيها دي إن شاء الله.
بس بشرط، تنفذ الخمس زفت خطوات دول كلهم ومتكنسلش حاجه منهم.
طب لو منفذتهمش
ما خلاص بقا احنا قلنا في الفيديو اللي فات،
يلا بينا:
طيب أول حاجه بتعملها لما تلاقي قدامك قطعة نصوص
متحررة (يعني أبيات شعر أو قطعة نثرية)هو إنك:
1- بتقرأ الأبيات قراءة متأنية، وبقول قراءة متأنية يعني ممكن تقرأ الأبيات 3
/ 4 مرات مفيش مشكلة،
وتحاول إنك تفهم الأبيات دي بتتكلم عن إيه بشكل عام كدا، وتاخد فكرة كويسه عنها، وبعدين
تقرأ الأسئلة اللي عليها،
فيقوم السؤال اللي
يجي لك تعرف هو بيسألك عن أي بيت في الأبيات اللي قدامك، ودا من خلال القراءة المتأنية
اللي أنت قرأتها، علشان متدوخش كتير في البحث عن الإجابة.
يبقا الخطوة الأولى هو إنك بتقرأ الأبيات وتحاول تفهم المعنى العام أو تاخد فكرة
كويسه عنها ، وبعدين تقرأ الأسئلة
أنت لسه محلتش!!!!
لأ إوعى تحل دلوقتي، وإلا كل اللي بنعمله دا يبوظ، وتروح ترمي الفيديو ده في الزباله، فقوم أزعل منك، وأجيب ناس تزعل كمان.
لأ انت بس بتحاول تعرف الإجابة بتاع السؤال ده ممكن تكون في أي بيت من الأبيات دي.
2- الخطوة التانية: وهي إني لازم ألخص الأبيات في جملة أو جملتين يفهموك هو الشاعر عايز إيه في الأبيات دي
واللي هم الفكر الجزئية والرئيسة والعامة اللي اتكلمنا عنهم في الفيديو اللي فات
بتاع القراءة المتحررة، ولو انت لو لسه لحد دلوقتي مسمعتوش فإنت فايتك كتير
جدا....
المهم:
- الفكرة الجزئية: يعني تفهم من كل بيت هو الشاعر عايز يقولك إيه.
- الفكرة الرئيسه: وهي إنك بعد ماتقرأ الأبيات، تقوم تلخصها كلها على بعضها
في جملة واحدة بتوضح هو الشاعر بيتكلم عن إيه.
- أما الفكرة العامة، أو زي ما أنا بسميها (عنوان الموضوع): وهو إنك تختصر الأبيات كلها في كلمتين ينفعوا يبقوا
عنوان للأبيات دي.
وهديك مثال بسيط على الخطوة دي: بيقولك مثلا:
أيها الطفل لا تخف عنت *** الدهر ولا تخش عاديات الليالي. (تشجيع الأطفال على المصاعب)
قيض الله للضعيف نفوسا *** تعشق البر من ذوات الحجال (ينصر الله الضعفاء)
فاصنعوا البر منعمين وجودوا *** أيها
القادرون قبل السؤال (دعوة للبر والكرم)
فحبيب قلبي ال 3 جمل اللي أنا لخصت بيهم الفقرة دول هم الأفكار الجزئية
ودول كلهم بيقولوا حاجه واحده بس (نصرة الله للضعفاء ومساعدة
الفقراء) والجملة اللي انا قلتها من غير ماتاخد بالك منها دي هي الفكرة
الرئيسة، أو الفكرة العامة أو تقدر تعتبرها عنوان لل3 أبيات دول لو هيسألني عن
عنوان ليهم.
وطبعا لو انت سمعت الفيديو اللي فات فمش محتاج أقولك انك لازم تعمل الكلام ده علشان
تفهم النص بشكل عام بيتكلم عن إيه، وتعرف تجاوب عن أي سؤال يقابلك فيه، وتبقا هارش
الدنيا ماشيه ازاي.
3- الخطوة التالته: (معاني الكلمات) لازم تحلل وتفهم معنى ومضاد ومفرد وجمع كل
كلمة في الأبيات اللي معاك دلوقتي
وبرضوا بقول دلوقتي يعني مش في الامتحان، علشان
محدش يجي يقولي أنا في الامتحان هيسألني عن كلمة واحده بس في الأبيات، مالي أنا
ومال الكلمات كلها
لأ يا حبيب قلبي مانا قلتلك قبل كدا إنه دلوقتي أنا بجهزك للامتحان، فلازم تحاول تجمع
أكبر قدر من المعلومات والمفردات تقوم تنفعك في أي امتحان تقابله
لأن أنا مش غرضي أنك تحل النص ده وبس لأ:
أنا غرضي أنك تجمع حصيلة لغوية وثقافة ومعلومات كبيرة جدا تنفعك في أي امتحان،
فلما تلاقي كلمة صعبة هتبقا أكيد هي أو اخواتها مرت عليا قبل كدا.
فإنت في الامتحان مش هتعمل كل ده، لأ أنت هتحل علطول، ولكن دلوقتي أنا لسه بجهزك
للامتحان فهمتني
طب واحده
واحده علي بقا: إزاي بطلع معاني الكلمات الصعبة:
هقولك الموضوع سهل جدا، وليه كذا طريقة:
1-
الطريقة الأولى واللي بنعملها كلنا وهي: التخمين
أو الهبد، ياعم تخيل
فحضرتك بتحاول من خلال السياق اللي معاك إنك تتخيل أو تهبد معنى الكلمة اللي
قدامك، وتشوف إيه الاختيار الأنسب ليها:
يعني مثلا عمك السموأل بيفتخر بقومه وبيقول:
إذا سيد منا خلا قام
سيد قؤول لما قال الكرام
فعول
فلو انت بتهبد كويس فممكن تقول إن خلا هنا: يعني خلص كلامه أو انتهى أو مات مثلا،
ودي طبعا إجابة صحيحة، بس ياريت تبقا تجرب الطرق التانية اللي قلنا عليها في
الفيديو اللي فات
2-
وهي إنك تحاول تجيب (عائلة الكلمة) يعني
اخواتها اللي شبهها،فقلنا إن ممكن واحده منهم تكون عدت عليك قبل كدا، يعني مثلا: تعصف
اخواتها اللي هم ( عصف – يعصف – عاصفة – عواصف) فهتقولي اه أنا أعرف العاصفة اللي
هي الرياح الشديدة، يبقا تعصف يعني : تهب بشدة.
3-
كمان ممكن تعرف معنى الكلمة الصعبة عن طريق
كلمة معطوفة عليها، لأنه في الغالب الكلمات بتعطف على اللي زيها أو اللي عكسها.
- اللي زيها يعني بمعناها زي مثلا ( لقيت في سفري العناء والكبد والمشقة)
- اللي ضدها أو عكسها زي مثلا ( اذكر الله في الإصباح والغسم)
4- ولو بعد دا كله لقيت برضوا كلمات صعبة عليك، متضايقش نفسك، دا طبيعي جدا،
انت مش سيبوية اللغة العربية، ولا دكتور في الجامعة، دا حتى الدكاترة ممكن تقابله
كلمة مش فاهم معناها فيبحث عنها عادي جدا... اه والله.
فإنت نزل علطول قاموس عربي عربي زي قاموس المعاني أو المعجم الشامل مثلا، وابحث عن
الكلمة ومعناها وهات المعنى ودونه تحت الكلمة الصعبة دي، صدقني مش هتنساها تاني
بس يفضل إنك تبحث بأصل الكلمة،يعني مثلا لما تيجي تبحث عن (الكبد) اكتب (كبد) بس فهيقوم
جايبلك معناها إن الكبد اللي هو التعب والليلة بتاعتها كلها.
4- الخطوة الرابعة: (الجماليات)
وهنا بقا قصدي على كل الجماليات اللي في النص، العلاقات اللي بين الجمل، والصور
البيانية والأساليب والمحسنات البديعية وكله كله، إحنا هنطلع من النص على قد ما
نقدر من جماليات.
طيب تعال بقا
نعرف إزاي نطلع: - العلاقات اللي موجودة في
النص: بكل بساطه:
* لما تلاقي كلمتين عكس بعض يبقا: تضاد زي (في السهل والعلم)
* لما تلاقي كلمتين بنفس المعنى يبقا: ترادف زي (الكبد والتعب)
* لما تلاقي جملة سبب لجملة قبلها يبقا الجملة التانية دي تعليل، ودي بسأل عنها بـ
(لماذا) زي (هذبوا فتاياتكم؛ فالعلم خير قوام)
* لما تلاقي جملة بتبين نتيجة شيء حصل في جملة قبلها يبقا الجملة التانية دي
نتيجة، ودي بسأل عنها بـ (إيه اللي هيحصل) زي (إن أكرمت ضيفا؛ فأنت حر)
* لما تلاقي جملة بتوضح اللي قبلها تبقا الجملة دي توضيح، زي (واتقوا الذي أمدكم
بما تعلمون * أمدكم بأنعام وبنين)
* لما تلاقي جملة مجملة وبعدها تقسيم أو تفصيله بتوضحها، يبقا التقسيمه دي تفصيل
بعد إجمال ، زي مثلا (نؤمن بالكتب السماوية: التوراة والإنجيل والقرآن)
فطبعا دي العلاقات المشهورة اللي بنتسأل عنها في معظم قطع النصوص المتحررة
لسه بقا مكلمتكش عن الصور البيانية: زي الاستعارة والتشبيه والكناية والمجاز
لسه بقية الأساليب: زي الأمر والنهي والنداء والتوكيد والإيجاز والإطناب ...إلخ
كمان بقية المحسنات البديعية: زي الجناس والتورية والتصريع وحسن التقسيم والذي منه
هتقولي يا أستاذ وليه كل الحزن ده يا أستاذ؟
هقولك لأ ماهو انت لازم يبقا عندك مهارة إنك تفهم أي كلام وتطلع كل الجماليات اللي
فيه
زي ماقلتلك أنا هدفي أربي مهارة عندك علشان تنفعك يوم الامتحان، تشوف اي قطعة نصوص
متنحررة تعرف تتعامل معاها وتطلع اللي يطلبه منك فيها، بس متبقاش تنسى تدعيلي.
طيب تعال بقا أديك مثال بسيط ونطبق عليه: الشاعر بيقول:
قريتي لا تقر روحي إلا
*** فيك مابين أسرتي ورفاقي
وإذا ما نأيت عنك صبت رو حي لألقاك دافق
الأشواق
أنت في القلب حيثما كنت إن في مصر أو في الكويت أو في العراق
تترائين لي كأنك فردوس فتهمي الدموع من آماقي
فزي مانت شايف إحنا حاولنا قدر الإمكان نطلع جماليات من النص اللي معانا، ودي خطوة
مهمة جدا هي ومعاني الكلمات وبيجي عليها في أي نص متحرر سؤالين أساسيين.
5- الخطوة الخامسة وهي: (تذوق الموضوع)
- فممكن يطلب مني أميز العاطفة المسيطرة على الشاعر
- أو إني استخلص بعض القيم من النص
- أو أميز الاتجاه الفكري للشاعر أو الكاتب
- أو أحدد ملامح شخصية الشاعر
- أو أميز خصائص أسلوبه
- أو حتى أعمل موازنة بين نصين مختلفين.
- طيب بالنسبة للعاطفة المسيطرة على الشاعر، فإنت بتحللها من خلال معنى الأبيات
والكلمات الأبرز فيها،
فمثلا الأبيات اللي معانا دي الكلمات الأبرز فيها واللي بتبين عاطفة الشعر هم:
(لا تقر روحي إلا فيك - أنت في القلب - كأنك فردوس)
وعلى فكرة مش لازم الكلمات
اللي أنا جبتها دي، انت من نفسك حاول تحس عاطفة الشاعر من خلال المعاني اللي هو
نقلها لنا
فبالنسبة لي أنا الكلمات دي حسستني إن
الشاعر بيحب قريته اوي وبيعتز بيها، فقوم لما اتسأل عن عاطفة الشاعر فهقول: (حب الشاعر واعتزازه بقريته)
وخلي بالك في فرق بين العاطفة والغرض، لأ الغرض ده اللي هو يعني مدح ولا فخر ولا
وصف ولا رثاء، الغرض الشعري اللي الشاعر كتب القصيدة من أجله، لأ دا غير العاطفة خالص
- طيب ممكن يطلب مني أستخلص بعض القيم من النص
فحبيب قلبي القيم دي يا إما إيجابية: زي الصدق والأمانه والوفاء والكرم، أو سلبية:
زي الكذب والخيانة والبخل...الخ.
ودي أنا بعرفها من خلال الكلمات اللي الراجل بيكررها في النص، من دليل هو ذكره في
النص، من أسلوب أمر أو نهي في النص يعني بيدعوك لحاجه حلوة فتعرف إن دي قيمة
إيجابية أو بينهاك عن حاجه مش كويسة فتعرف إن دي قيمة سلبية وهكذا.
فمثلا الأبيات اللي معانا هو بيدعونا لقيمة: الوفاء للأهل والحنين للوطن، فدي طبعا
قيمة ايجابية...
- ممكن يطلب مني أميز الاتجاه الفكري للشاعر أو الكاتب:
يعني هو اتجاهه ديني ولا وطني ولا علمي ولا قومي ولا اجتماعي
هتقولي يا أستاذ وأنا مال أمي هو أنا هطلعله بطاقه، وبعدين أنا هفضل ماشي وراه
أشوفه بيعمل إيه ويسوي إيه علشان أعرف اتجاهه الفكري
هقولك لأ ياحلاوة، انت بتعرف الاتجاه الفكري من الكلام اللي قدامك
يعني هنا الاتجاه: وطني، لأن الراجل بيتكلم عن قريته اللي اتولد فيها ودايما مشتاق
لها.
- ممكن يطلب مني أحدد ملامح شخصية الشاعر
وهنا أنت بتشوف موقف الشاعر في الأبيات اللي معاك إيه، ومن خلال موقفه آرائه بتقدر
تحكم على شخصيته
فهنقول مثلا هنا: إن الشاعر اللي معانا ده: أصيل، واجتماعي، ومحب لأهله ورفاقه
- ممكن يطلب مني أميز خصائص أسلوب الشاعر: (يعني الألفاظ والمعاني
والأساليب بتاعته عامله ازاي)
وهنا بقا إنت لازم تاخد بالك من شوية حاجات لما تيجي تجاوب عن سؤال زي ده:
* هي الألفاظ: سهله ومعبرة عن مشاعر الكاتب بالنسبة لك ولا مش سهلة ولا معبرة.
* الأفكار: واضحه ومترابطة ولا لأ
* بالنسبة للأساليب: بص في الأبيات اللي معاك ودور على استفهام أمر نهي شرط أو قصر
أوحاجه من دي، شوف موجوده الحاجات دي ولا لأ
* الصور والخيال: هل موجود في الأبيات كدا استعارة تشبيه مجاز حاجات من دي ولا لأ
* بالنسبة للموسيقا: هل في جناس أو تصريع أو سجع أو الحاجات اللي بتعمل أثر في
الأذن دي ولا مفيش في الأبيات حاجه من دي.
* بالنسبة للمحسنات البديعية: هل في طباق مقابلة وترداف والذي منه
لو لقيت الحاجات دي قول الكلام ده وعبر عنه بأسلوبك:
قول دا الألفاظ سهلة ومعبرة عن مشاعر الكاتب، قول المعاني والأفكار واضحه ومترابطه
وأنه بينوع بين أساليب الخبر والإنشاء وهكذا.
قول إن الرجل بيعتمد على الصور البيانية أوالموسيقا مثلا لما تلاقي حاجات من دي
قول إن الراجل بيكثر من المحسنات أو بيقلل على حسب اللي معاك ... دور وطلع وقول
ومتخافش، إنت كدا ماشي صح على فكرة، فيلا اشتغل.
فدا سؤال بيعتمد على إنك بتعرف تتذوق النص فعلا وتعرف إيه اللي فيه ولا لأ، ودا
طبعا بيجي مع التدريب والحل الكتير.
- وأخيرا ممكن يطلب مني في تذوق الموضوع إني أعمل موازنة بين نصين مختلفين.
فهنا بكل بساطه إحنا بنشوف الحاجات المشتركة مابينهم وأوجه الاختلاف ونحددهم
يعني مثلا يجيب لك قول السموأل:
وأيام مشهورة في عدونا لها غرر معلومة وحجول
سلي إن جهلت الناس عنا وعنهم فليس
سواءً عالمٌ وجهول
وبعدين يجيب لك قول عمرو بن كلثوم:
وأيام لنا غر طوال عصينا الملك فيها أن ندينا
متى ننقل إلى قوم رحانا يكونوا
في اللقاء لها طحينا
ويقوم قايلك بقا إيه: وازن بين قولي السموأل وعمرو بن كلثوم من حيث المعنى
والفكرة:
فاحنا عندنا السموأل هنا بيقول
فحبيب قلبي دول الخمس خطوات اللي
لو مشيت معاهم هتبقلظ أي نص متحرر يقابلك، ومش هيبقا عندك أي مشكلة خالص مع النصوص
المتحررة وهتلاقي نفسك بتحب الشعر بطريقة غريبة.
ولكن سيبني أختم معاك بالوصية دي: وهي
إنه لازم تحل كتير جدا جدا جدا
أيوه حل كتير يمكن نص من اللي انت بتحلهم يجي لك في
الامتحان، أو يكون مر عليك قبل كدا، ليه لأ.
ودا حصل في الثانوية العامة السنة اللي فاتت جاب قطعة من القطع اللي موجوده في أحد
الكتب الخارجية، وحصل برضو مع تانيه ثانوي، ممكن يكون مش نفس السؤال بالظبط، ولكن
خلاص الطالب بقا عنده فكره من النص لأنه حلله وفهمه قبل كدا.
فحل كتير ومتملش ومتزهقش، وإوعي تنسى إن الثانوية الحزن اللي انت فيها دي اسمها
(ثانوية المعلومات) يعني اللي يجمع معلومات ويحل أكثر هيجيب مجموع أكبر.
في النهاية أتمنى إني أكون أفدتك، ولو ده حصل فعلا، فياريت
متنسانيش من دعائك
وياريت كمان تعمل لايك للفيديو وتشاركه مع كل زمايلك
علشان هما كمان ويستفيدوا وتاخد ثوابهم بإذن الله تعالى
ليست هناك تعليقات:
إرسال تعليق