7
خطوات لإتقان أي قطعة قراءة متحررة للصف
الأول الثانوي
هل تعلم أن سؤال القراءة المتحررة يعد من أصعب
الأسئلة في امتحان الثانوية العامة، ما دمت وصلت إلى هنا وتقرأ هذا المقال، فأنت
تعلم ، ولديك مشكلة بالفعل!!!!
ولكنك لا تعلم أنني أكتب لك اليوم الحل
النهائي لهذه المشكلة بفضل الله تعالى.
بداية، أنا أخوك أحمد ناجي معلم لغة عربية،
وصاحب قناة دروس عربية على اليوتيوب، وأحاول تدريس اللغة العربية وأظهرها على أنها
سهلة وبسيطة، محاولة مني أن أضحك عليك، ولكن أنا على يقين من أنك قد اكتشفت هذه
الخدعة.
الحقيقة أنني أكتب إليك لأعلمك كيف تجيب عن أي
سؤال قطعة قراءة متحررة تقابلك، وهذا من خلال 7 خطوات في غاية الأهمية، لو نفذتهم لن
تجد عناءً يُذكر مع القراءة المتحررة في هذه الثانوية الملعونة.
بداية عندما تقرأ قطعة قراءة متحررة لابد أن:
1- الخطوة الأولى: تقرأ الموضوع قراءة سريعة، ثم تقرأ الأسئلة وتفتش عن مكان
الإجابات: لكي تعرف المكان المحتمل أن يكون فيه إجابة السؤال الذي تقرأه، وذلك من
خلال القراءة السريعة التي قرأتها، لئلا تتعب كثيرا في البحث عن الإجابة.
2- الخطوة التانية: وهي فهم الموضوع بشكل عام:
أي: تحدد الفكر الجزئية الموجوده في كل فقرة والفكر الرئيسه والفكرة
العامة؛ لتلخص الموضوع وتبلوره في عدة جمل تفهمك غرض الكاتب.
- الفكرة الجزئية: يعني تفهم من كل جملة أو جملتين المقصود منهما.
- الفكرة الرئيسه: وهي أنك بعد قراءة الفقرة، تلخصها في جملة واحدة توضح قصد
الكاتب من هذه الفقرة.
- أما الفكرة العامة، وأسميها أنا (عنوان الموضوع): وهي أن تختصر الموضوع
في جملة واحدة تلخص ماقصدة الكاتب من المقال.
مثال بسيط:
(لقد كفل الإسلام حقوق
المرأة، فما منظم حقوق المرأة إلا الإسلام، فقد رعاها خير رعاية، إذ كانت مهضومة
الحق في الجاهلية، فرد الإسلام للمرأة حقوقها، وجعلها كفئا للرجل، ودعا في غير آية
إلى معاملة الزوجات بالمعروف، ولقد كفل الإسلام للمرأة حقوقها حتى لنراها في الصدر
الأول من العصر الإسلامي تشارك في الأحداث السياسية).
نلخص هذه الفقرة في ثلاث جمل: ( الاسلام كفل حقوق المرأة - ورد لها حقوقها –أدلة على تكريم المرأة
في الإسلام)
هذه الجمل الثلاث هي الأفكار الجزئية.
وكلهم يقول شيئا واحدا وهو: (رعاية الاسلام لحقوق المرأة) وهذه الجملة هي الفكرة
الرئيسة.
أما الفكرة العامة: فتصل إليها بعد تصنع ماصنعت الآن مع كل فقرة في القطعة حتى تلخص
القطعة كلها في جملة واحده تكون هي الفكرة العامة أو عنوان الموضوع.
3- الخطوة الثالثه: حلل كل كلمة في درس القراءة: فلابد من: أن
- تعرف المعنى والمضاد والمفرد والجمع لكل كلمة
- تستخرج العلاقات الموجودة في النص من قبل أن يسألك مثل: ( النتيجة والتعليل
والتفصيل والتوضيح والتوكيد ....إلخ).
- تستخرج التضاد والترادف والمقابلة (وحبذا لو يوجد في القطعة محسنات مثل السجع أو
الجناس أو صور بيانية مثل الاستعارات والكنايات والتشبيهات والمجاز ...إلخ).
تقول لي يا أستاذ: هل هي حرب سندخلها، أم قطعة قراءة لم كل هذا؟
أقول لك:
عندما تستخرج معنى ومضاد وجمع ومفرد كل كلمة تقابلك، فليس الهدف حل القطعة وفقط لا:
أنا غرضي أن تجمع حصيلة لغوية وثقافة ومعلومات كبيرة جدا تنفعك في أي امتحان، فعندما
تقابل كلمة صعبة يتكون هي أو أخواتها مرت علياك من قبل.
وكذلبك تستخرج الكنايات والاستعارات ليكون لديك مهارة أن تفهم أي كلام تقرأه
وتستخرج مابه من جماليات.... فهمت؟
كيف أستخرج معاني
الكلمات الصعبة:
سأقول لك بكذا طريقة:
1-
الطريقة الأولى وهي: التخمين أو الهبد، حاول
تخمن معنى الكلمة الصعبة من خلال السياق أو الجملة، وتختار الاختيار الأنسب لها:
مثال: في درس حاتم الطائي: كان حاتم صفوحا يغفر زلات قومه استبقاءً
لودهم.
فبالتخمين نصل إلى أن زلات: تعني عيوب أو أخطاء، وهذه إجابة صحيحة.
2-
الطريقة الثانية: (عائلة الكلمة) أي أخواتها
التي تشبهنها ، يمكن أن تكون قرأت واحده منهم من قبل:
مثال: وتعصف الريح الباردة بأطناب الخيام
تعصف أخواتها هم ( عصف – يعصف – عاصفة – عواصف) ولعلك تعرف (العاصفة) وهي الرياح
الشديدة، إذا: تعصف: تهب بشدة.
3-
الطريقة الثالثة: (الكلمات المعطوفة) لأنه في
الغالب الكلمات تعطف على مثلها أو عكسها.
- مثلها وبمعناها مثل: (لقيت في سفري العناء والكبد والمشقة)
- ضدها أو عكسها مثل: (اذكر الله في الإصباح والغسم)
4-
الطريقة الرابعة: (قاموس عربي عربي) مثل قاموس
المعاني أو المعجم الشامل مثلا، وتبحث عن الكلمة ومعناها
ويفضل أن تبحث بأصل الكلمة، فعندما تبحث عن (تعصف) اكتب (عصف) فستجد معناها إن عصفت
الرياح يعني هبت بشدة وهكذا.
العلاقات الموجودة
في النص: بكل بساطه:
* لما تلاقي كلمتين عكس بعض يبقا: تضاد زي (الإصباح والغسم)
* لما تلاقي كلمتين بنفس المعنى يبقا: ترادف زي (الكبد والتعب)
* لما تلاقي جملة سبب لجملة قبلها يبقا الجملة التانية دي تعليل، ودي بسأل عنها بـ
(لماذا) زي (اعتزل حاتم الحرب؛ لأنه كان يكره
العنف)
* لما تلاقي جملة بتبين نتيجة شيء حصل في جملة قبلها يبقا الجملة التانية دي نتيجة،
ودي بسأل عنها بـ (إيه اللي هيحصل) زي (إن أكرمت ضيفا؛ فأنت حر)
* لما تلاقي جملة بتوضح اللي قبلها تبقا الجملة دي توضيح، زي (الفاعل: هو من قام بالفعل أو اتصف به)
* لما تلاقي جملة مجملة وبعدها تقسيم أو تفصيله بتوضحها، يبقا التقسيمه دي تفصيل
بعد إجمال ، زي مثلا (تنظيم المعاملات كالتجارة
والزراعة والصناعة)
وهكذا فدي الخطوة التانية بتاعت معاني الكلمات والعلاقات بين الجمل، ودي خطوة مهمة
جدا وبيجي عليها في أي قطعة سؤالين أساسيين
4- الخطوة الرابعة: استنتج العلاقة بين الفقرة التي معك وفقرة أخرى: ويقول
لك:
(هات الفكرة المشتركة بينهما):
مثال: هات العلاقة بين الفقرة السابقة وبين قول النبي صلى الله عليه وسلم
"استوصوا بالنساء خيرا"
فلو فكرنا بشكل بسيط وقلنا إن محتوى الفقرة يتكلم عن رعاية الإسلام للمرأة (وهي
الفكرة الرئيسة للفقرة السابقة) ، وننظر للحديث فتجد أن النبي صلى الله عليه وسلم يوصي
أيضا بحسن رعاية المرأة، فإذا الفكرة المشتركة بينهما:
- رد الحقوق لأصحابها - كيفية معاملة النساء
- رعاية الاسلام لحقوق المرأة -
التحلي بمكارم الأخلاق
أجب بنفسك علينا في التعليقات.
5- الخطوة الخامسة استنتج شخصية الكاتب وموضوعيته:
يعني هل الكاتب موضوعي أم غير موضوعي، يعني محايد ولا متحيز لرأي معين.
بكل بساطة:
لو الكاتب بيقول اللي ليه واللي عليه، يبقا موضوعي، لو بيقول اللي ليه بس ميبقاش
موضوعي
وخلي بالك: لو بيقول اللي ليه بس وجاب على كلامة ده دليل، يعني هو متحيز لفكرة
وجاب عليه دليل واضح يبقا برضو موضوعي، طب لو مجابش ... بالظبط كدا
- يعني مثلا، الفقرة اللي معانا دي نقدر نقول بكل بساطة إن الكاتب موضوعي، لأنه
أكد على الفكرة بتاعته اللي هي (رعاية الاسلام لحقوق المرأة) بدليل المعاملة
بالمعروف، وإن الست كانت بتشارك في الأحداث السياسية وهكذا.
6- الخطوة السادسة: تذوق الموضوع: يعني إيه: يعني ممكن ينطلب مني:
- إني أجيب دليل من عندي أو من الفقرة على موقف أو قضية أو رأي موجود
معايا في الفقرة.
ففي الفقرة بتاعتنا دي ممكن يقولك: دلل من الفقرة على أن الإسلام كفل للمرأة
حقوقها، فإنت علطول هينور في دماغك كذا دليل: زي:
1- المعاملة بالمعروف. 2- أن
المرأة كانت تشارك في الأحداث السياسية
- ممكن يطلب مني أحدد غرض الكاتب أو وجهة نظره في الموضوع ده:
ففي الحالة دي أنا بسأل نفسي سؤال: لماذا كتب الكاتب هذا المقال:
فلو انا طبقت اللي فات كله أنا خلاص فهمت الموضوع، فهقول إن غرضه: إظهار مافي
الإسلام من تكريم واحترام لحقوق للمرأة.
- ممكن يطلب مني في تذوق الموضوع إني (أصدر حكم على شخصية معينة)
الكاتب بيتكلم عنها في الموضوع، ويجيبلي مثلا فقره زي دي:
( كان حاتم محبا للسلام في
عصو اتسم بالقوة، فاعتزل حاتم حرب الفساد التي سقط فيها خيرة قومه، ونزل في بني
بدر؛ لأنه كان يكره العنف، ويعزف عن الشر، وكان ينصح ابنه عديا قائلا "
يابني: إذا رأيت الشر يتركك فاتركه").
وبعدين يقولي : ماحكمك وتقييمك لشخصية حاتم الطائي في ضوء الفقرة السابقة؟
فهتقولي والله يا مستر واضح كدا من الفقرة إن حاتم دا كان بيحب السلام أو بيكره الحرب
أو العنف يعني
هقولك بالظبط هي دي الإجابة: حاتم
يحب السلام و يكره الحرب والعنف.
- ممكن يطلب مني: إني أبدي رأيي الشخصي في موقف أو قضية معينة داخل الموضوع
فيقولي مثلا:
في ضوء ما قرأت قيم رأي حاتم الطائي باعتزال حرب الفساد ونصيحته لابنه أن
يترك الشر مما يلي: ويديني شوية اختيارات:
1- أرى أنه رأي صائب؛ فالسلامة في الابتعاد عن الناس
2- أرى أنه موقف سلبي وهروب من مواجهة الشر
3- أتفق معه في الرأي؛ لأنه فرغ نفسه لعمل الخير.
4- أتفق معه في موقفه، وأختلف فيما نصح به ابنه
فهنا بكل بساطه علشان تسهل على نفسك لما تيجي تبدي رأيك: اسأل نفسك أولا (هل أنت
متفق مع في الفكرة ولا مختلف، شايف إن الرأي ده صح ولا غلط، إيجابي ولا سلبي)
فهنا طبعا رأي حاتم صح أو إيجابي فهتتفق معاه، ولو هتستخدم طريقة الاستبعاد،
فهتستبعد الإجابة التانيه لأن انت موقفك إيجابي هنا مش سلبي، وهسيبك بقا تختار
الإجابة الصح وتقولي في التعليقات.
- ممكن يطلب مني أقترح حلول لمشكلة معينة داخل الموضوع
فشوف ياسيدي:علشان
تحل مشكلة إنت لازم تشوف إيه أسبابها الأول، وبعدين تقلب الأسباب دي لحلول، يعني
مثلا مشكلة معاكسة البنات: أسبابها إن فيه أولاد متربوش، وإن في بنات بتلبس لبس مش
عفيف، وإن مفيش عقوبة للي بيعاكس بنت في الشارع، فدول 3 أسباب للمشكلة، تعال بقى
نقلبهم لحلول:
- أول حاجه: نربي ولادنا ونعرفهم إن دا عيب
- رقم اتنين منخرجش بناتنا بلبس مثير للشباب
- رقم تلاته:يبقا فيه قانون بيجرم الموضوع ده لأنه ممكن يوصل لمصيبة التحرش،
فالولد لو عرف إنه هيتعمله قضية محمرشة مش هيفكر يعمل كدا تاني، وبكدا يبقا حلينا
المشكلة.
- ممكن يطلب مني إني أقترح نهايات بدل النهاية اللي معايا لو كان الموضوع
عبارة عن قصة أو حكاية.
فدي سهلة ،إنت بكل بساطة بتتخيل نهاية تانيه غير اللي معاك من خلال فهمك
لأحداث الموقف أو القصة اللي هو مديهالك.
- كمان لازم أعرف إزاي أكتشف التناقض اللي موجود في أي كلام معايا لو فيه
تناقض.
يعني مثلا واحد يسألك عن أبوك فتقوله: أبي في البيت ، وبعدين تعرف إنه
رايح يقول لأبوك إنه بتعاكس البت سماح اللي على أول الشارع: فتقوم تقوله: أبي ليس
في البيت. فدا كدا اسمه تناقض سلب وإيجاب يعني انت قلت حاجه وبعدين قلت عكسها.
أو حتى تناقض ذاتي، يعني مثلا مينفعش حاجه واحدة تكون حق وباطل في نفس الوقت أو صح
وغلط في نفس ذات الوقت، فدا اسمه تناقض ذاتي.
- طيب ممكن يطلب مني أميز بين الحقائق والآراء والادعاءات.
بص يا رواقه: الحقيقة دي حاجه معليهاش اختلاف: زي مثلا ( السماء فوقنا
والأرض تحتنا) فدي حاجه محدش هيجادلك فيها، فدي حقيقة
الرأي: دا بقا حاجه ممكن اتنين يختلفوا عليها، زي ما تجي تقولي مثلا: (لا إله إلا
إلا الله) فهقولك: دا رأيك انت، دا كدا يعتبر رأي
هتقولي يا أستاذ متفوق بقا: هو فيه إله تاني غير ربنا، احنا هنكفر ولا إيه
هقولك: لأ، بس فيه ناس عايشه معانا على نفس الكوكب ده، وبيعتقدوا أو بيعبدوا آلهة
تانيه، فـ (لا إله إلا إلا الله) تعتبر رأي، لأن بكل بساطه ممكن حد يختلف معاك
فيه.
أما الادعاء: فدا كدبه واضحه مش محتاج نقاش أو دليل. بس كدا.
7- الخطوة السبعة والأخيرة: لازم تحل كتير جدا جدا جدا، أيوه حل كتير يمكن قطعة من اللي انت بتحلهم تيجي لك في
الامتحان، أو تكون مرت عليك قبل كدا، ليه لأ.
ودا حصل في الثانوية العامة السنة اللي فاتت جاب قطعة من القطع اللي موجوده في أحد
الكتب الخارجية، وحصل برضو مع تانيه ثانوي
ممكن يكون مش نفس الأسئلة تيبيكال، ولكن خلاص الطالب بقا عنده فكره.
فحل كتير ومتملش ومتزهقش، ولو نفذت الخطوات اللي انت قلتلك عليها دي، هتجمع أكبر قدر
من المعلومات اللي هتنفعك في الثانوية الحزن اللي انت فيها.
واللي أنا بلخصها في كلمتين (ثانوية المعلومات) اللي عندو معلومات أكتر هو اللي
هيحل أكتر وهيجيب مجموع أكبر.
حبايب قلبي دول السبع خطوات اللي لازم تنفذهم علشان تقفل
أي سؤال قراءة متحررة يجي لك.
في النهاية أتمنى إني أكون أفدتك، وإن المجهود اللي أنا بذلته في الفيديو ده، يكون
عاد بفايده عليك، فياريت متنساناش من دعائك
ليست هناك تعليقات:
إرسال تعليق