علشان كدا عملتلكم الفيديو ده وهو عبارة عن قنبلة أو بمثابة هدية قوية جدا حبيت أقدمهالكم بمناسبة الكاميرا الجديدة وهو إزاي تذاكر النحو في الأيام العادية بالطريقة الصحيحة مش بس كده كمان ازاي تقدر تلم المادة في أيام الامتحانات وتراجع على المادة في عدد ساعات قليل جدا في يوم واحد بس.
إيه ده في يوم واحد إنت عايز تقول إنه أنا ممكن أذاكر النحو كله في يوم واحد وأحل عليه كمان وأخش أقفل في الامتحان
هقولك مع إني مقلتش التشكيلة بتاعتك دي كلها إلا أنه لو انت هتتحداني بقولك أه ينفع
ينفع إنك تذاكر معانا النحو كله في يوم واحد وتحل عليه ومتبقاش محتاج في المادة أي حاجه تاني، وتخش تقفل في الامتحان كمان بإذن الله تعالى، بس بشرط تسمع كل اللي هقولك عليه وتنفذه بالحرف وصدقني هتفتكرني بعد الامتحان إن شاء الله وهتدعيلي، بس المهم تسمع الكلام ومتخليش أي حاجه تصرفك عن اللي هطلبه منك مهما كان، سمعت مهما كان.
يلا بينا
بص يا سيدي حضرتك هتنفذ التالي:
هتروح جاي الأول مصلي ركعتين كدا لله سبحانه وتعالى تطلب فيهم ان هو يعينك على اللي هتعمله ده، بعد كدا هتقفل موبايلك تماما وهتفتح جهاز الكمبيوتر بتاعك
هتقولي يامستر معليش أنا معنديش كمبيوتر، أنا معايا الموبايل بس وسارق واي فاي من جارنا اللي جنبنا
هقولك تمام بس كدا هينطلب منك تقفل إشعارت الفيس بوك والواتساب والماسنجر ووسائل التواصل اللي ممكن تقطع خلوتك دي في أي وقت، الهدف إنه مفيش حاجه تشغلك عن اللي بتعمله أيا ماكان ودا أهم شرط.
هتكتب في قائمة البحث بتاع اليوتيوب (دروس عربية) هتلاقي العبد الفقير ظهر قدامك هتخش على أي فيديو من فيدوهاتي وبعدين من تحت الفيديو علطول هتخش على القناة بأنك تدوس على اللوجو أو على كلمة دروس عربية
بعدين هتخش على قوائم التشغيل واللي منها هتخش على قائمة تشغيل 3 ثانوي أزهر واللي هتلاقي فيها بقا دروس النحو بتاعتك كلها بالترتيب من أول النعت لحد العدد
الدروس دي كلها على بعضها مدتها الزمنية حوالي 5 ساعات ، وكلها مشروحة بطريقة سهلة وممتعة وكمان مش ناقصة أي معلومة
يعني انت معاك المنهج كله في 5 ساعات بس يامعلم ومش ناقصك أي حاجه
أنا عارف إنك دلوقتي اتحمست بطريقة رهيبة، ولكن اوعى الحماس ده يخليك تقفل الفيديو وتروح بسرعه على السرير بتاعك وتسمعهم ورا بعض لحد ما عنيك تروح في النوم وتقول إن شاء الله بكره هصحى على صوت ماما وهي بتقولي أصحا علشان متتأخرش على كلية الطب... لأ اهدى على نفسك واحده واحده وإن شاء الله مفيش مستحيل
المهم هتضغط على أول فيديو وتسمعه واحده واحده وبكل تركيز واوعى تعدي معلومة وانت مش فاهمها، ارجع عيدها تاني هي مش صعبة ولا مشروحة بطريقة غلط، صدقني انت اللي دماغك سرحت شويه فمتخليهاش تسرح تاني زي ماقلتلك
بعد ما هتخلص الفيديو وتتأكد إنك فهمته كله هتبتدي تمسك كتاب المعهد أيوه كتاب المعهد
هتروح على التدريبات بتاعت الدرس اللي انت سمعته يعني مثلا انت سمعت النعت فهتجيب التدريبات الي على النعت وتبتدي تحل فيها
المهم هنا بقا انك تحل التدريبات بتاعت كتاب المعهد دي كلها، ومتسألنيش ليه ، حلها كلها، ولو في أي حاجه وقفت قدامك بترجع للشرح تاني تسمع أنا قلتلك إيه في الحتة دي وتفهم كويس وترجع تحل، المهم إوعى تسيب نقطة من غير حل
طيب خلاص حليت وخلصت
الخطوة اللي بعد كدا هو إنك هتخش تسمع الفيديو اللي بعد الفيديوهات دي وهو المراجعة النهائية بتاعت النحو اللي فيها عرفناك إزاي تحل الامتحان عن طريق اختبارات متوقعة ومهمة جدا وكل الأسئلة اللي بتتكرر كتير في الامتحانات واللي بعدهم هتحس إن انت خلاص اطمنت على نفسك وانت داخل الامتحان في المادة دي
بس أنا أفضل إنك برضو بعدها لو عندك وقت تجيب شوية اختبارات بنظام البوكليت أو شوية نماذج لامتحانات سابقة وتبتدي تحلهم بطريقة منظمة وخط نظيف علشان تعرف بنفسك الحاجات اللي بتكرر ومتبقاش مخضوض من شكل الامتحان وتبقا عملت كذا بروفه عليه.
كمان عايز أقولك إن الخطوات دي انت لو كررتها كلها تاني مرة تانية أو تالته هتستفيد استفادة عظيمة جدا وهتثق في نفسك أكتر بس للمرة الأخيرة بقولك نفذ اللي قلتلك عليه بالحرف وبالترتيب ولما تخرج من الامتحان متنسانيش من دعائك
كمان ياريت متنساش تعمل لايك الفيديو وتبعته لكل زمايلك وتشاركه مع كل طلبة 3ثانوي أزهر علشان يستفيدوا منه وتاخد ثوابهم وتكون سبب إن حد منهم يجيب الدرجة النهائية في النحو صدقني ثواب عظيم جدا
ليست هناك تعليقات:
إرسال تعليق