كيف تذاكر مادة الصرف وتحصل على الدرجة النهائية - للصف الثالث الثانوي أزهري- دروس عربية - دروس عربية

اخر الاخبار

دروس عربية

دروس عربية هي مدونة تهتم بتعليم اللغة العربية بجميع فروعها (نحو وصرف وبلاغة وأدب ونصوص) لجميع المراحل والمستويات

الثلاثاء، 24 مايو 2022

كيف تذاكر مادة الصرف وتحصل على الدرجة النهائية - للصف الثالث الثانوي أزهري- دروس عربية



السلام عليكم إخواتي وحبايبي طلاب سنه 3 ثانوي أزهر وحشتوني جدا ، وأهلا بكم في مفاجأة جديدة من مفاجآت دروس عربية اللي بنقدمهالكم هنا من غير ما نبخل عليكم بأي معلومة ولا نبخل عليكم بأي جهد، ومش بنعايركم طبعا

النهارده إن شاء الله هعرفك إزاي تذاكر مادة الصرف
زي ما عرفتك في الفيديو اللي فات إزاي تذاكر النحو وتقفل فيه بإذن الله، وياريت اللي ماسمعش افيديو ده يسمعه لأنه مهم جدا جدا وبيعرفك إزاي تقضي على مادة النحو تماما ومتبقاش شايل همها، أما النهارده بقا هعرفك إزاي تذاكر مادة الصرف المادة العنيدة اللي استعصت على طلاب كتير من طلاب سنة تالته ثانوي أزهر، وجابتلهم عقدة نفسية.

خلاص النهارده بإذن الله هنجيب من الآخر وعايزك تركز معايا شويتين تلاته.

بص يا سيدي مبدأيا عايزك تعرف إنه اللي هقولك عليه ده مجرب على نوعية مقبولة جدا من الطلاب وجاب معاهم نتيجة فوق الممتازة، وإنك لازم تعمل كل اللي هطلبه منك من غير ما تسأل ليه ومن غير ما تخل بالترتيب اللي هقولك عليه، ممكن تفصل شويه لو حابب تريح في النص أو تقسم وقتك، ولكن لما ترجع تذاكر هتكمل منين ماوقفت.

وصدقني أنا والله مش بشتغلك ولا عايز أضيع وقتك أنا بجيب معاك من الآخر وبنصحك لوجه الله تعالى، علشان تقدر تذاكر المادة دي بالطريقة الصحيحة وتعرف تلمها في عدد ساعات قليل جدا.

بس بشرط إنك تسمع اللي بقولك عليه وتنفذه بالحرف ومتنسانيش من دعائك بعد ماتخرج من الامتحان إن شاء الله.

طيب أولا هتروح تصلي ركعتين لله سبحانه وتعالى تطلب فيهم ان هو يعينك على اللي هتعمله ده، بعد كدا هتقفل موبايلك تماما وهتفتح جهاز الكمبيوتر بتاعك

ولو إنت معاك الموبايل بس وسارق واي فاي من جارك اللي جنبك، يبقا هينطلب منك تقفل إشعارت الفيس بوك والواتساب والماسنجر ووسائل التواصل اللي ممكن تقطع عليك خلوتك وتضيع وقتك، وتشغلك عن اللي بتعمله، نصيحة متخليش التليفون يضحك عليك.

بعدين هتروح على اليوتيوب وتكتب في قائمة البحث (دروس عربية) هتلاقي العبد الفقير ظهر قدامك هتخش على أي فيديو من فيدوهاتي وبعدين من تحت الفيديو علطول هتخش على القناة بأنك تدوس على اللوجو أو على كلمة دروس عربية

بعدين هتخش على قوائم التشغيل وبعدين قائمة تشغيل 3 ثانوي أزهر واللي هتلاقي فيها بقا دروس الصرف بتاعتك كلها بالترتيب من أول همزة الوصل لحد الإدغام.

الدروس دي كلها على بعضها مدتها الزمنية حوالي 3 ساعات ونصف ، وكلها مشروحة بطريقة سهلة وممتعة وكمان مفيش فيها معلومة ناقصة.

يعني حضرتك معاك منهج أصعب مادة في العربي كله في 3 ساعات ونص بس، ومش ناقصك أي معلومة، أعتقد إنها حاجة تستحق انك تستعجب وتقول ازاي دا أنا من أول السنة بروح دروس ومش قادر المها، ولكن لما تشوف اللي بقولك عليه هتستعجب أكتر.

المهم هتضغط على أول فيديو وتسمعه واحده واحده وبكل تركيز، واوعى تعدي معلومة وانت مش فاهمها، ارجع عيدها تاني وركز هتلاقي نفسك فهمتها وهكذا لحد ماتخلص الدرس.

بعد ماتخلص الدرس حاول تلخص المواضع اللي انت اخدتها في ورقة بسيطة كدا أو حتى علم عليهم في الكتاب اللي معاك علشان تبقا فاكرهم لما تيجي تحل تدريبات من كتاب المعهد

هتقولي إيه ده كتاب المعهد، اللي هو شكله عامل ازاي يعني.

هقولك طبعا، بعد ما هتخلص أي درس وتتأكد إنك فهمته كله هتبتدي تمسك تدريبات كتاب المعهد بتاعت الدرس اللي انت سمعته وتحلها، يعني مثلا انت سمعت همزة الوصل وهمزة القطع هتجيب التدريبات الي على الدرس ده وتبتدي تحل فيها

المهم هنا بقا انك تحل التدريبات بتاعت كتاب المعهد دي كلها، ومتسألنيش ليه ، حلها كلها، ولو في أي حاجه وقفت قدامك ارجع للشرح تاني واسمع أنا قلتلك إيه في الحتة دي وافهم كويس وارجع حل، أهم حاجه إوعى تسيب نقطة من غير حل.

طيب خلاص حليت وخلصت كل الدروس بالطريقة دي من غير ماتعدي ولا درس أو تكسل فيه.
الخطوة اللي بعد كدا هو إنك هتخش تسمع الفيديو اللي بعد الفيديوهات دي وهو المراجعة النهائية بتاعت الصرف اللي فيها عرفناك إزاي تحل الامتحان عن طريق اختبارات متوقعة ومهمة جدا وكل الأسئلة اللي بتتكرر كتير في الامتحانات واللي بعدهم هتحس إن انت خلاص اطمنت على نفسك وانت داخل الامتحان في المادة دي ومعندكش فيها أي مشكلة.

ولكن ياريت لو عندك وقت لسه على الامتحان إنك تجيب شوية اختبارات بنظام البوكليت أو شوية نماذج لامتحانات سابقة وتبتدي تحلهم بطريقة منظمة وخط نظيف علشان تعرف بنفسك الحاجات اللي بتكرر ومتبقاش مخضوض من شكل الامتحان وتبقا عملت كذا بروفه عليه كدا والدنيا معاك زي اللوز.

كمان حابب أقولك إن الخطوات دي لو انت كررتها كلها مرة تانية أو تالته هتستفيد استفادة عظيمة جدا وهيبقى عندك ثقة في نفسك وسعادة وراحة بال لا يمكن تتخيلها واسألني أنا عن الهدوء والاطمئنان من ناحية المادة دي وانت داخل الامتحان.

في النهاية بكرر واقولك تاني وتالت نفذ اللي قلتلك عليه بالحرف وبالترتيب ومتفوتش أي درس سواء كان الشرح أو حل التدريبات بالذات ولما تخرج من الامتحان متنساش تدعيلي.

والناس اللي بعتت لي وقالت إنهم بيدعولي علطول، مش عارف أقولكم إيه انتو اخواتي وحبايبي وأنا كمان بدعيلكم إنه كل واحد فيكم يحقق اللي بيحلم بيه والكلية اللي بيتمناها، ويرضيكم بالخير كله يارب

إخواتي وحبايبي متنسوش تعملو لايك للفيديو وتبعتوه لكل زمايلكم وتشاركوه مع طلاب 3ثانوي أزهر علشان يستفيدوا منه وتاخدو ثوابهم ولما تكون سبب إن حد منهم يجيب الدرجة النهائية في الصرف صدقني ثوابك هيبقا عظيم جدا



ليست هناك تعليقات:

إرسال تعليق